D-in FJÖGUR - fyrir tímastjórnun

​Ef þú starfar í vinnuumhverfi þar sem er mikill hraði og verkefnin hrannast upp þá er gott að nýta sér hugmyndafræðina um D-in fjögur til þess að ná betri tökum á tíma og verkefnum.
D-in fjögur eru: Dump, Delegate, Do og Designate.
Hugmyndafræðin er sú að þegar þú færð nýtt verkefni eða aðgerð sem þú þarft að gera þá þarftu að ákveða hvaða D þú ætlar að nota til þess að að tækla það.  

1. Dump: Hættu að gera hluti! Ef þú ert nú þegar með langan lista af verkefnum eða aðgerðum sem þú átt eftir að gera er gott að líta yfir listann og taka allt það út sem þú veist að þú ætlar ekki eða munt ekki gera. Ef við tökum dæmi um tölvupóst þá gæti það verið að  það komi fjöldapóstur sem þú ætlar þér ekki að líta á síðar þá er bara gott að afskrá sig af listanum og eyða póstinum.
2. Delegate: Ekki reyna að gera allt sjálfur. Farðu yfir verkefnalistann þinn og skoðaðu hvort aðrir séu mögulega betri til þess fallnir að leysa verkefnið. Ekki gleyma að það getur gefið samstarfsmönnum tækifæri til þess að læra og vaxa. Ef við höldum áfram með dæmið um e-mail, það kemur e-mail og þú metur sem svo að samstarfsfélagi geti gert það. Sendu það strax áfram til þess að athuga hvort hann geti tekið þetta af sér. Bókaðu svo fund í framhaldinu til þess að taka stöðuna.
3. Do: Kláraðu lítil verkefni strax og helst mörg lítil í einu. Gott er að miða við það að byrja á því sem þér þykir leiðinlegt að gera því það er mjög algengt að við förum bara í verkefni sem okkur finnst skemmtileg og þá náum við aldrei að fara í það sem við þurfum að gera.
4. Designate: Taktu frá tíma í lengri verkefni. Ef það kemur eitthvað á þitt borð og þú þarft að gera það en þú hefur ekki tíma strax. Taktu frá tíma í dagatalinu þínu til þess að gera það. Þá er hægt að vinna án streitu í öðrum verkefnum því þú veist þú hefur tekið frá tíma til þess að vinna að þessu verkefni.

Með því að nýta D-in fjögur geturðu bætt bæði þína eigin tímastjórnun, aukið samvinnu innan teymis og leyft starfsmönnum að vaxa. Vertu skipulagður, deildu ábyrgðinni og fylgstu með hvernig verkefnin klárast! 

---